الهي و قفت دموعي تسيل و قلبـي ببابـك بـاك ذليـل فذنبي كبير و زادي قليـل فمـن عـلـي بعـفـو جمـيـل أتيـت اجـر خطايـا السنيـن اتيت الـى ارحـم الراحميـن و كلي اعتقاد و كلي يقين بـان لديـك شـفـاء العلـيـل سألـتـك مغـفـرة لـلـذنـوب و سترا لما مسنا من عيوب فأنت الهـي طبيـب القلـوب و نور هداك يضيء السبيل

Tuesday, January 29, 2008

كاكا وتريكة










كاكا وتريكة
طبعا كلنا شفنا الحركة الرائعة اللي عملها الكابتن أبو تريكة ربنا يكرمه ويقويه وشيء رائع اننا نلاقي لاعب كرة مهتم بقضية انسانية خطيرة جداً زي دي خاصة انه انسان محبوب وكل العالم اتكلم عن اللي عمله
لكن انا مش داخل دماغي حكاية ان اللي عمل شعار ديني أو سياسي ياخد انذار أساسا والكلام التالي لكابتن جمال الشريف الحكم السوري المعروف تم الغاء بند الانذار عند خلع اللاعب لقميصه بعد احراز الاهداف إلا لو استفز به جمهور الفريق الاخر
وبعدين نروح أوروبا ونشوف هناك لاعب أخر موهوب ويحمل رقم 22 أيضا طبعا عارفينه كاكا لاعب الميلان الخطير الذي حسب أقواله هو شخصياً سيعمل كقسيس عندما يعتزل كرة القدم أعتقد مفيش تدين أكثر من كده راجل معاه ملايين حيسيب كل ده ويعمل في الكنيسة
المهم ان السيد كاكا كلما أحرز هدفا يرفع قميصه ومكتوب تحته
I BELONG TO JESUS
يعني كترجمة حرفية أنا انتمي للمسيح
ورغم ذلك لا بياخد انذارات ولا كروت ولا تحذير ولا أي حاجة
وايضا اللاعب اللي رفع علم اسرائيل محدش كلمه
يعني لا شعار ديني أخد أنذار ولا اللي رفع شعار سياسي أخد انذار
طبعا انا أؤمن بنظرية المؤامرة وياريت محدش يقولي اني رجعي واللي ليه أي تفسير ياريت يبعتلي ويقوللي ليه اللاعب المسلم تحصله مشاكل بينما أي لاعب أخر لا يحدث له أي شيء
عموما اسيبكم تفكروا وقولولي رأيكم

Wednesday, January 23, 2008

اضحك مع الوزير محمد عثمان

اضحك مع الوزير محمد عثمان
سيادة الوزير محمد عثمان وزير تخطيط واسمعوا تصريحه الاخير عشان تتأكدوا ان سيادته رجل مخطط فعلا (امنعوا الضحك محدش يفهمني صح لو سمحتم)
صرح سيادته في الأهرام أن الدولة في العام الماضي انفقت على كل مواطن مصري (ركز معايا في الرقم) مليون ومائة وسبعة وخمسون ألف دولار.
التصريح ده خرج من حوالي أسبوعين وانا باحاول من يومها اني أكتب أي تعليق على هذا الموضوع ومش عارف .
هو الطريف كان في أصدقائي لأني عملت كده شبه مسح لأرائهم في هذا الموضوع هل سيادتك حاسس ان بيتصرف عليك مليون ومائة وسبعة وخمسون ألف دولار سنويا ؟ طيب ما رأي سيادتك في هذا الكلام ؟
المهم أصدقائي أجمعوا على نقطة طريفة حيث طلب كل واحد منهم إني أبلغ سيادة الوزير على لسانه انه عايز حقه ناشف بتاع سنة واحدة فقط (فلوس يعني) وهو حيمشي ويسيب البلد ويوفر لسيادته هذا المبلغ .
الأطرف ان الشعب المصري أثبت رضاه وقبوله بأي شيء حتى وهو يأخذ حقه حيث طلب البعض الحصول على مائة وسبعة وخمسين ألف دولا فقط ومتبرع بالمليون لسداد ديون مصر .
بل وصلت أن قال أحد اصدقائي المتزوج ويعول طفلين انه موافق أنه يأخد هو وزوجته وطفليه نصف مليون دولار فقط وبكده يوفر للحكومة 4 مليون دولار ويعتبروهم تبرع منهم للحكومة.
مش عارف أقول ايه ؟ ايه رأيكم انتم تاخدوا كام وتسيبوا البلد وتطلعوا معاش مبكر J

Monday, December 31, 2007

اضحك مع الاخبار

اضحك مع الاخبار
ذكر الاستاذ أحمد المسلماني في برنامج الطبعة الاولى خبر جعلني أضحك حتى البكاء
فقد ذكر سيادته ان دولة بليز (هو ده اسمها متنحش) أرسلت خطاب احتجاج لوزارة الخارجية لوقف مصر معوناتها إليها .
طبعا الخبر حيديك شوية دلالات وأفكار جميلة جدا.
أولاً : فيه دولة اسمها بليز مش احنا كنا بنهزر ونقول دولة الأناملية نسبة لكلمة أنا مالي فتيجي سيادتك تكتشف أن هناك دولة اسمها بليز يعني معنى اسمها أرجوك (من فضلك – لو سمحت – نزل ايدك تحت) طبعا ده شيء مهم ولكن الأهم ان مصر يا جماعة بتدي معونات لحد يعني احنا دولة كبيرة وبندي معونات وكمان بنقطعها وواضح ان مصر قطعت المعونات عن دولة بليز احتجاجا على قطع أمريكا جزء من معوناتها لمصر على اعتبار ان دولة بليز من الدول المؤيدة لإسرائيل (معلومة مؤكدة : بليز أحد أربع دول في أمريكا الوسطى تؤيد أمريكا في كل قراراتها ضد العرب والفلسطينيين) وإذا كانت أمريكا بتقطع فاحنا ايدنا طايلة بالصلاة على النبي وضربناهم في مقتل . طبعا مصر دولة ذات قرار مستقل ومن الواضح ان بليز تخطت كل الخطوط الحمراء التي ذكرها سيادة وزير الخارجية من قبل في عدة مناسبات عموما يا جماعة لازم نقف جميعا وراء الحكومة ضد أي ردود أفعال عنيفة من أمريكا أو أي دولة أخرى ونربط الاحزمة انتظارا لعقوبات من الأمم المتحدة .
وبلييييييييييييييز محدش يحظن اني باهزر انا باتكلم جد وربنا يستر J

Sunday, December 30, 2007

بشرة خير ولكن

القضاء الإداري يرفض حجب أحد المواقع الإلكترونيةويؤكد‏:‏ حرية التعبير بوسائلها كافة يحميها الدستور
القاهرة ـ من حسام الجداوي‏:
انتهت محكمة القضاء الإداري دائرة المنازعات الاقتصادية والاستثمارية بمجلس الدولة إلي أن تعرض أحد المواقع الإلكترونية لشخص ما بالإهانة لا يصلح سببا لاتخاذ قرار بحجب الموقع بالكامل‏,‏ وذلك ضمانا لحرية الرأي‏.‏ وأكدت المحكمة أن حرية التعبير مكفولة بكل وسائلها‏,‏ وأنه لا يجوز تقييدها إلا في حالات الضرورة الملجئة‏,‏ وهي المساس بأمن الدولة‏,‏ وسلامة نظامها واستقرارها‏,‏ والحفاظ علي المصالح العليا للوطن‏.‏وقضت المحكمة ـ برئاسة المستشار أحمد أمين حسان‏,‏ وعضوية المستشارين صلاح الجرواني‏,‏ وفتحي زكي نائبي رئيس المجلس‏,‏ وسكرتارية كريم حسين ـ برفض الدعوي المقامة من المستشار الدكتور عبدالفتاح مراد رئيس محكمة الاستئناف بالإسكندرية ضد رئيس مجلس الوزراء‏,‏ ووزراء الاتصالات‏,‏ والعدل‏,‏ والداخلية‏,‏ والتضامن لحجب‏49‏ موقعا ومدونة حقوقية علي شبكة الإنترنت‏,‏ لتعرضها لشخصه بالإهانة والتشهير‏,‏ كما ادعي مساسها بالمصالح العليا للوطن وبالأمن القومي‏.‏ وقضت بتأييد قرار جهة الإدارة بعدم حجب هذه المواقع من علي شبكة الإنترنت حفاظا علي حرية الرأي والتعبير التي كفلها الدستور‏.‏
إلى هنا انتهى الخبر وطبعا بشرة خير ان لسه فيه حد ممكن يقول لأ لكن اللي يقلق في الموضوع طبعا هي حيثيات الحكم اللي قالت أنه لا يجوز حجب موقع لنشره خبر فيه تشهير ولكن قالت إنه يجوز غلق موقع في حالات تانية وهي بالنص
(وأنه لا يجوز تقييدها إلا في حالات الضرورة الملجئة‏,‏ وهي المساس بأمن الدولة‏,‏ وسلامة نظامها واستقرارها‏,‏ والحفاظ علي المصالح العليا للوطن‏)
طبعا كلام كبير لكنه واسع جدا جدا جدا يعني ممكن نفس الراجل اللي رفع القضية دي يرفعها تاني وتشوف المحكمة ان التشهيربشخصه مس بأمن الدولة مثلا أو سلامة النظام
عموما الحمدلله وحمدلله على سلامة النظام

Thursday, December 27, 2007

اضحك مع تصريحات الوزراء

اضحك مع تصريحات الوزراء
-طبعا السادة الوزراء في أيامنا البيضا دي على الاقل بالنسبة لي يعتبروا من الناس المؤمنين بجد اللي بيحاولوا يساعدونا . ياريت محدش يشتمني لو سمحتم ده رأيي وبصوا لنصف الكوب المملوء (ده بالنسبة للي عندهم كوب أساسا) الناس دي بتحاول تدخل السرور على قلب المسلم بتصريحاتهم اللي أقل ما يقال عنها أنها كوميدية .
وبص معايا لأخر تصريح لسيادة وزير الكهرباء سيادته قبل سنة ونصف قال ان مصر لا تفكر أبداً في دخول مجال الطاقة النووية ولكن بعد موافقة الرئيس على الموضوع فوجئت به من أسبوعين بيقول تصريح لو قلناه لطالب في ثانوي مش مهندس كهرباء مثلا حيفطس من الضحك . سيادته قال بالحرف الواحد (مصر لديها جميع الامكانيات لإدخال الطاقة النووية – الطاقة النووية أفضل وأنظف بديل لجميع أنواع الطاقة بما فيها الشمس والرياح)
ولا أدري كيف يمكن أن تكون الطاقة النووية أرخص من الشمس إلا إذا كانت الحكومة ناوية تخصخص الشمس وتخلينا ندفع فواتير أو مثلا ناوية تعبي الشمس في أزايز .
تخيلوا سيادتكم الوضع وسيادتك جايلك فاتورة الشمس مثلا في شهر يناير بخمسين جنيه وسيادتك بتتخانق مع المحصل وبتقوله
- حرام عليك ده الشمس مطلعتش إلا يومين ثلاثة طول الشهر
المحصل : يابيه دي مش مصاريف الاستهلاك ؟
سيادتك : أمال دي مصاريف ايه ؟
المحصل : يا بيه دي مصاريف الاشتراك الشهري
سيادتك : مصاريف ايه يا عم الحاج هو انتوا بتعملوا ايه في الشمس
المحصل : هو انت مش بتدفع مصاريف اشتراك في التليفون ومبتخدش قصادها حاجة اشمعنى الشمس اللي جاي تتكلم عليها .
سيادتك : انا مش قصدي حاجة انا بس باحاول افهم مصاريف ايه
المحصل : مصاريف ان الحكومة موفرالك الأتموسفير اللي بيوصلك الشمس لحد عندك من غير تعب
سيادتك : مين ابو سفير ده ياباشا
المحصل : انت صعب تفهم دي ؟
سيادتك : معلش يا باشا تعالى على نفسك واشرحلي .
المحصل : يابني الناس اللي ساكنين فوق القطب الشمالي وتحت القطب الجنوبي الخرم بتاع الأوزون موجود فوق دماغهم علطول يعني الاشعة الضارة نازلة على رأسهم وبتجيبلهم المرض والعيا ومفيش عندهم شمس إلا شهر واحد في السنة أما سيادتك فالحكومة سدت الخرم اللي فوق رأس الشعب كله عشان الشعب ميجيلوش إلا الشمس نظيفة وزي الفل . بقى بذمتك كل ده ميستاهلش ان حضرتك تدفعله اشتراك .
سيادتك : طبعا نستاهل
المحصل : احمد ربنا على النعمة الحكومة جابتلكم بلد زي الفل في حتة نظيفة وهواها جميل تخيل لو وديناكم تعيشوا في السويد مثلا البرد والسقعة والدفايات بذمتك تستحمل تعيش في السويد في الضنك اللي الناس شايفاه هناك ده .
سيادتك : أأأأأأأه ه ه ه ه ه ه
المحصل : المهم بعد كل ده حتدفع ولا نقطع عنك الشمس .
سيادتك : طيب ممكن ياباشا نقسطهم انت عارف المرتب تعبان والمصاريف كتير
المحصل : يووووووووووووووووووووووه انت شكلك كده بتشتكي كتير وبتسأل كتير بقولك ايه خد الكعب وفي خلال يومين تدفع أحسنلك يا إما حنرجع الخرم فوق دماغك تاني .
سيادتك : حنتصرف ياباشا ان شاء الله انا مش ناقص أخرام .

Tuesday, December 25, 2007

تحب تبقى محافظ بورسعيد ولا رئيس أمريكا ؟؟؟

تحب تبقى رئيس أمريكا ولا محافظ بورسعيد ؟؟؟
واضح انه اجابة السؤال واضحة وصريحة شيء مش محير على الاطلاق طبعا رئيس أمريكا ياباشا .
بورسعيد ايه موقعها على الخريطة يا معلم ؟ وبعدين طبعا الاخوة اللي بيحبوا بورسعيد حيقولولي لا طبعاً دي حاجة كبيرة جدا . ماشي يا شباب حاجة كبيرة طبعا على عيني وعلى راسي .
المهم أمريكا طبعا أكبر قوة اقتصادية وعسكرية في العالم يعني ولا كلمة
طيب يا شباب بعيد عن المناظر والمنظرة والكلام الفارغ نحسبها بالورقة والقلم .
لو سيادتك رئيس أمريكا حتاخد كام في السنة ؟ تخيل 650 ألف دولار في السنة . اي والله العظيم هما دول بس .
طيب سيادتك مفيش بدل سفر بدل حضور جلسات بدل تمثيل (على اعتبار ان رئيس أمريكا أكبر ممثل)
لا ياباشا مفيش حاجة من دي خالص . يعني سعادة جناب رئيس أمريكا بعد 8 سنين حرق في أعصابه لإدارة أكبر دولة في العالم ومع جبر الكسور لصالحه يعني نحسبله السنة بمليون دولار يكون إجمالي دخله 8 مليون دولار .
عموما مش وحش برده لأن أكيد لما حابقى رئيس أمريكا حيدوني الجنسية ومش حاضطر إني أركب مركب واغرق بيها في ايطاليا مثلا .
طيب سيادة محافظ بورسعيد بياخد كام ؟؟؟
مش حنتكلم على الموضوع ده كتير لأن حكاية بياخد كام دي متفرعة جداً
احنا حنتلكك للباشا على أحد تصريحاته اللي قالها وهو مش واخد باله يا عيني
فسيادته صرح لجريدة الأهرام في نهاية العام الماضي ان بورسعيد عملت دخل لمصر يقدر ب 4 مليار جنيه وهو حصيلة بيع أراضي في مناطق مختلفة تابعة لبورسعيد.
جميل ربنا يخلي بورسعيد لمصر دايما . لكن اللي يهمنا ان سيادة المحافظ له نسبة قانونية في هذه المبالغ 3% طبعا نسبة بسيطة تعالوا نحسبها 3% من 4 مليار يعني 120 مليون جنيه طيب نحولهم دولار على اعتبار ان الدولار ب 6 جنيه يطلعوا 20 مليون دولار !!!
اي والله العظيم محافظنا الهمام كسب 20 مليون دولار في 7 سنين ورئيس أمريكا كسب 8 مليون دولار في 8 سنين يعني محافظ بورسعيد كسب مرة ونصف ضعف مرتب رئيس أمريكا في فترة زمنية أقل بعام كامل .
تخيل سيادتك في دولة قال سيادة وزير التخطيط محمد عثمان أن 40% من سكانها يستحقون الدعم . في دولة يقوم الناس فيها بالاضراب لزيادة مرتباتهم 200 جنيه يعني 35 دولار بس في دولة أتخن موظف فيها مرتبه يبلغ 300 دولار يكسب محافظها 20 مليون دولار .
احنا بنتكلم عن محافظ مش وزير . محافظ مش رئيس وزراء . محافظ مش رئيس جمهورية .
مش عارف اقول ايه
انا عموما حجزت على مركب رايحة ايطاليا بكره
خلي بالك من العيال يا باتعة :)))

Monday, December 24, 2007

ضحكات صارخة

-الدول العربية غريبة جداً فسوريا السنية يحكمها بشار الاسد العلوي و لبنان المسلمة (اذا جمعنا السنة والشيعة) رئيسها إميل لحود ماروني وفلسطين رئيس سلطتها أبو مازن جذور عائلتة ايرانية ولكن بعد كل ذلك تذكرت ريادة مصر في كل شيء عندما تذكرت ان مصر تحكمها الاقلية المنوفية منذ عام 1974
- اكتشفت احدى القوافل الطبية الحكومية ان أمين شرطة بالمنوفية يملك حالة نادرة الحدوث حيث أن قلبه يقع في الناحية اليمنى من الصدر وليس العكس
سمعت أن السيد رئيس الجمهورية أمر بعلاجه على نفقة الدولة وإرجاع قلبه للناحية اليسرى .
-قررت الحكومة أن تضيف عنصر الحديد لرغيف العيش ربنا يستر وميخلوش عز ياخد توكيل الحديد .
- بمناسبة الحديد اللي في العيش الحكومة عشان تأسس بنية جيدة للشعب قررت أن تمنح ترخيصا لمعامل اللبن التي تضيف بودرة السيراميك على اللبن وأهو كله لبناء جيل جديد من الشعب
- سألت صديقي المشاكس المعارض دائماً هل صحيح ان الحكومة وفرت العام الماضي مليون فرصة عمل فرد علي أكيد طبعاً لم أصدق الرد فصديقي مشكك دائما في انجازات الحكومة فسألته طيب وايه الدليل قاللي لأني انا شخصياً أعمل في 3 وظائف منهم
-تخيلوا الحكومة المصرية وأجهزة أمنها فشلت لفترة طويلة في القبض على عصابة السمورة والهبلة أكيد أمريكا لو حاولت تحتل مصر حتستعين بعصابة الدكتور عمر .