الهي و قفت دموعي تسيل و قلبـي ببابـك بـاك ذليـل فذنبي كبير و زادي قليـل فمـن عـلـي بعـفـو جمـيـل أتيـت اجـر خطايـا السنيـن اتيت الـى ارحـم الراحميـن و كلي اعتقاد و كلي يقين بـان لديـك شـفـاء العلـيـل سألـتـك مغـفـرة لـلـذنـوب و سترا لما مسنا من عيوب فأنت الهـي طبيـب القلـوب و نور هداك يضيء السبيل

Monday, December 31, 2007

اضحك مع الاخبار

اضحك مع الاخبار
ذكر الاستاذ أحمد المسلماني في برنامج الطبعة الاولى خبر جعلني أضحك حتى البكاء
فقد ذكر سيادته ان دولة بليز (هو ده اسمها متنحش) أرسلت خطاب احتجاج لوزارة الخارجية لوقف مصر معوناتها إليها .
طبعا الخبر حيديك شوية دلالات وأفكار جميلة جدا.
أولاً : فيه دولة اسمها بليز مش احنا كنا بنهزر ونقول دولة الأناملية نسبة لكلمة أنا مالي فتيجي سيادتك تكتشف أن هناك دولة اسمها بليز يعني معنى اسمها أرجوك (من فضلك – لو سمحت – نزل ايدك تحت) طبعا ده شيء مهم ولكن الأهم ان مصر يا جماعة بتدي معونات لحد يعني احنا دولة كبيرة وبندي معونات وكمان بنقطعها وواضح ان مصر قطعت المعونات عن دولة بليز احتجاجا على قطع أمريكا جزء من معوناتها لمصر على اعتبار ان دولة بليز من الدول المؤيدة لإسرائيل (معلومة مؤكدة : بليز أحد أربع دول في أمريكا الوسطى تؤيد أمريكا في كل قراراتها ضد العرب والفلسطينيين) وإذا كانت أمريكا بتقطع فاحنا ايدنا طايلة بالصلاة على النبي وضربناهم في مقتل . طبعا مصر دولة ذات قرار مستقل ومن الواضح ان بليز تخطت كل الخطوط الحمراء التي ذكرها سيادة وزير الخارجية من قبل في عدة مناسبات عموما يا جماعة لازم نقف جميعا وراء الحكومة ضد أي ردود أفعال عنيفة من أمريكا أو أي دولة أخرى ونربط الاحزمة انتظارا لعقوبات من الأمم المتحدة .
وبلييييييييييييييز محدش يحظن اني باهزر انا باتكلم جد وربنا يستر J

Sunday, December 30, 2007

بشرة خير ولكن

القضاء الإداري يرفض حجب أحد المواقع الإلكترونيةويؤكد‏:‏ حرية التعبير بوسائلها كافة يحميها الدستور
القاهرة ـ من حسام الجداوي‏:
انتهت محكمة القضاء الإداري دائرة المنازعات الاقتصادية والاستثمارية بمجلس الدولة إلي أن تعرض أحد المواقع الإلكترونية لشخص ما بالإهانة لا يصلح سببا لاتخاذ قرار بحجب الموقع بالكامل‏,‏ وذلك ضمانا لحرية الرأي‏.‏ وأكدت المحكمة أن حرية التعبير مكفولة بكل وسائلها‏,‏ وأنه لا يجوز تقييدها إلا في حالات الضرورة الملجئة‏,‏ وهي المساس بأمن الدولة‏,‏ وسلامة نظامها واستقرارها‏,‏ والحفاظ علي المصالح العليا للوطن‏.‏وقضت المحكمة ـ برئاسة المستشار أحمد أمين حسان‏,‏ وعضوية المستشارين صلاح الجرواني‏,‏ وفتحي زكي نائبي رئيس المجلس‏,‏ وسكرتارية كريم حسين ـ برفض الدعوي المقامة من المستشار الدكتور عبدالفتاح مراد رئيس محكمة الاستئناف بالإسكندرية ضد رئيس مجلس الوزراء‏,‏ ووزراء الاتصالات‏,‏ والعدل‏,‏ والداخلية‏,‏ والتضامن لحجب‏49‏ موقعا ومدونة حقوقية علي شبكة الإنترنت‏,‏ لتعرضها لشخصه بالإهانة والتشهير‏,‏ كما ادعي مساسها بالمصالح العليا للوطن وبالأمن القومي‏.‏ وقضت بتأييد قرار جهة الإدارة بعدم حجب هذه المواقع من علي شبكة الإنترنت حفاظا علي حرية الرأي والتعبير التي كفلها الدستور‏.‏
إلى هنا انتهى الخبر وطبعا بشرة خير ان لسه فيه حد ممكن يقول لأ لكن اللي يقلق في الموضوع طبعا هي حيثيات الحكم اللي قالت أنه لا يجوز حجب موقع لنشره خبر فيه تشهير ولكن قالت إنه يجوز غلق موقع في حالات تانية وهي بالنص
(وأنه لا يجوز تقييدها إلا في حالات الضرورة الملجئة‏,‏ وهي المساس بأمن الدولة‏,‏ وسلامة نظامها واستقرارها‏,‏ والحفاظ علي المصالح العليا للوطن‏)
طبعا كلام كبير لكنه واسع جدا جدا جدا يعني ممكن نفس الراجل اللي رفع القضية دي يرفعها تاني وتشوف المحكمة ان التشهيربشخصه مس بأمن الدولة مثلا أو سلامة النظام
عموما الحمدلله وحمدلله على سلامة النظام

Thursday, December 27, 2007

اضحك مع تصريحات الوزراء

اضحك مع تصريحات الوزراء
-طبعا السادة الوزراء في أيامنا البيضا دي على الاقل بالنسبة لي يعتبروا من الناس المؤمنين بجد اللي بيحاولوا يساعدونا . ياريت محدش يشتمني لو سمحتم ده رأيي وبصوا لنصف الكوب المملوء (ده بالنسبة للي عندهم كوب أساسا) الناس دي بتحاول تدخل السرور على قلب المسلم بتصريحاتهم اللي أقل ما يقال عنها أنها كوميدية .
وبص معايا لأخر تصريح لسيادة وزير الكهرباء سيادته قبل سنة ونصف قال ان مصر لا تفكر أبداً في دخول مجال الطاقة النووية ولكن بعد موافقة الرئيس على الموضوع فوجئت به من أسبوعين بيقول تصريح لو قلناه لطالب في ثانوي مش مهندس كهرباء مثلا حيفطس من الضحك . سيادته قال بالحرف الواحد (مصر لديها جميع الامكانيات لإدخال الطاقة النووية – الطاقة النووية أفضل وأنظف بديل لجميع أنواع الطاقة بما فيها الشمس والرياح)
ولا أدري كيف يمكن أن تكون الطاقة النووية أرخص من الشمس إلا إذا كانت الحكومة ناوية تخصخص الشمس وتخلينا ندفع فواتير أو مثلا ناوية تعبي الشمس في أزايز .
تخيلوا سيادتكم الوضع وسيادتك جايلك فاتورة الشمس مثلا في شهر يناير بخمسين جنيه وسيادتك بتتخانق مع المحصل وبتقوله
- حرام عليك ده الشمس مطلعتش إلا يومين ثلاثة طول الشهر
المحصل : يابيه دي مش مصاريف الاستهلاك ؟
سيادتك : أمال دي مصاريف ايه ؟
المحصل : يا بيه دي مصاريف الاشتراك الشهري
سيادتك : مصاريف ايه يا عم الحاج هو انتوا بتعملوا ايه في الشمس
المحصل : هو انت مش بتدفع مصاريف اشتراك في التليفون ومبتخدش قصادها حاجة اشمعنى الشمس اللي جاي تتكلم عليها .
سيادتك : انا مش قصدي حاجة انا بس باحاول افهم مصاريف ايه
المحصل : مصاريف ان الحكومة موفرالك الأتموسفير اللي بيوصلك الشمس لحد عندك من غير تعب
سيادتك : مين ابو سفير ده ياباشا
المحصل : انت صعب تفهم دي ؟
سيادتك : معلش يا باشا تعالى على نفسك واشرحلي .
المحصل : يابني الناس اللي ساكنين فوق القطب الشمالي وتحت القطب الجنوبي الخرم بتاع الأوزون موجود فوق دماغهم علطول يعني الاشعة الضارة نازلة على رأسهم وبتجيبلهم المرض والعيا ومفيش عندهم شمس إلا شهر واحد في السنة أما سيادتك فالحكومة سدت الخرم اللي فوق رأس الشعب كله عشان الشعب ميجيلوش إلا الشمس نظيفة وزي الفل . بقى بذمتك كل ده ميستاهلش ان حضرتك تدفعله اشتراك .
سيادتك : طبعا نستاهل
المحصل : احمد ربنا على النعمة الحكومة جابتلكم بلد زي الفل في حتة نظيفة وهواها جميل تخيل لو وديناكم تعيشوا في السويد مثلا البرد والسقعة والدفايات بذمتك تستحمل تعيش في السويد في الضنك اللي الناس شايفاه هناك ده .
سيادتك : أأأأأأأه ه ه ه ه ه ه
المحصل : المهم بعد كل ده حتدفع ولا نقطع عنك الشمس .
سيادتك : طيب ممكن ياباشا نقسطهم انت عارف المرتب تعبان والمصاريف كتير
المحصل : يووووووووووووووووووووووه انت شكلك كده بتشتكي كتير وبتسأل كتير بقولك ايه خد الكعب وفي خلال يومين تدفع أحسنلك يا إما حنرجع الخرم فوق دماغك تاني .
سيادتك : حنتصرف ياباشا ان شاء الله انا مش ناقص أخرام .

Tuesday, December 25, 2007

تحب تبقى محافظ بورسعيد ولا رئيس أمريكا ؟؟؟

تحب تبقى رئيس أمريكا ولا محافظ بورسعيد ؟؟؟
واضح انه اجابة السؤال واضحة وصريحة شيء مش محير على الاطلاق طبعا رئيس أمريكا ياباشا .
بورسعيد ايه موقعها على الخريطة يا معلم ؟ وبعدين طبعا الاخوة اللي بيحبوا بورسعيد حيقولولي لا طبعاً دي حاجة كبيرة جدا . ماشي يا شباب حاجة كبيرة طبعا على عيني وعلى راسي .
المهم أمريكا طبعا أكبر قوة اقتصادية وعسكرية في العالم يعني ولا كلمة
طيب يا شباب بعيد عن المناظر والمنظرة والكلام الفارغ نحسبها بالورقة والقلم .
لو سيادتك رئيس أمريكا حتاخد كام في السنة ؟ تخيل 650 ألف دولار في السنة . اي والله العظيم هما دول بس .
طيب سيادتك مفيش بدل سفر بدل حضور جلسات بدل تمثيل (على اعتبار ان رئيس أمريكا أكبر ممثل)
لا ياباشا مفيش حاجة من دي خالص . يعني سعادة جناب رئيس أمريكا بعد 8 سنين حرق في أعصابه لإدارة أكبر دولة في العالم ومع جبر الكسور لصالحه يعني نحسبله السنة بمليون دولار يكون إجمالي دخله 8 مليون دولار .
عموما مش وحش برده لأن أكيد لما حابقى رئيس أمريكا حيدوني الجنسية ومش حاضطر إني أركب مركب واغرق بيها في ايطاليا مثلا .
طيب سيادة محافظ بورسعيد بياخد كام ؟؟؟
مش حنتكلم على الموضوع ده كتير لأن حكاية بياخد كام دي متفرعة جداً
احنا حنتلكك للباشا على أحد تصريحاته اللي قالها وهو مش واخد باله يا عيني
فسيادته صرح لجريدة الأهرام في نهاية العام الماضي ان بورسعيد عملت دخل لمصر يقدر ب 4 مليار جنيه وهو حصيلة بيع أراضي في مناطق مختلفة تابعة لبورسعيد.
جميل ربنا يخلي بورسعيد لمصر دايما . لكن اللي يهمنا ان سيادة المحافظ له نسبة قانونية في هذه المبالغ 3% طبعا نسبة بسيطة تعالوا نحسبها 3% من 4 مليار يعني 120 مليون جنيه طيب نحولهم دولار على اعتبار ان الدولار ب 6 جنيه يطلعوا 20 مليون دولار !!!
اي والله العظيم محافظنا الهمام كسب 20 مليون دولار في 7 سنين ورئيس أمريكا كسب 8 مليون دولار في 8 سنين يعني محافظ بورسعيد كسب مرة ونصف ضعف مرتب رئيس أمريكا في فترة زمنية أقل بعام كامل .
تخيل سيادتك في دولة قال سيادة وزير التخطيط محمد عثمان أن 40% من سكانها يستحقون الدعم . في دولة يقوم الناس فيها بالاضراب لزيادة مرتباتهم 200 جنيه يعني 35 دولار بس في دولة أتخن موظف فيها مرتبه يبلغ 300 دولار يكسب محافظها 20 مليون دولار .
احنا بنتكلم عن محافظ مش وزير . محافظ مش رئيس وزراء . محافظ مش رئيس جمهورية .
مش عارف اقول ايه
انا عموما حجزت على مركب رايحة ايطاليا بكره
خلي بالك من العيال يا باتعة :)))

Monday, December 24, 2007

ضحكات صارخة

-الدول العربية غريبة جداً فسوريا السنية يحكمها بشار الاسد العلوي و لبنان المسلمة (اذا جمعنا السنة والشيعة) رئيسها إميل لحود ماروني وفلسطين رئيس سلطتها أبو مازن جذور عائلتة ايرانية ولكن بعد كل ذلك تذكرت ريادة مصر في كل شيء عندما تذكرت ان مصر تحكمها الاقلية المنوفية منذ عام 1974
- اكتشفت احدى القوافل الطبية الحكومية ان أمين شرطة بالمنوفية يملك حالة نادرة الحدوث حيث أن قلبه يقع في الناحية اليمنى من الصدر وليس العكس
سمعت أن السيد رئيس الجمهورية أمر بعلاجه على نفقة الدولة وإرجاع قلبه للناحية اليسرى .
-قررت الحكومة أن تضيف عنصر الحديد لرغيف العيش ربنا يستر وميخلوش عز ياخد توكيل الحديد .
- بمناسبة الحديد اللي في العيش الحكومة عشان تأسس بنية جيدة للشعب قررت أن تمنح ترخيصا لمعامل اللبن التي تضيف بودرة السيراميك على اللبن وأهو كله لبناء جيل جديد من الشعب
- سألت صديقي المشاكس المعارض دائماً هل صحيح ان الحكومة وفرت العام الماضي مليون فرصة عمل فرد علي أكيد طبعاً لم أصدق الرد فصديقي مشكك دائما في انجازات الحكومة فسألته طيب وايه الدليل قاللي لأني انا شخصياً أعمل في 3 وظائف منهم
-تخيلوا الحكومة المصرية وأجهزة أمنها فشلت لفترة طويلة في القبض على عصابة السمورة والهبلة أكيد أمريكا لو حاولت تحتل مصر حتستعين بعصابة الدكتور عمر .

Sunday, December 16, 2007

جحا وجيمي

الاخوة الاعزاء
بمناسبة النكد اللي احنا عايشين فيه ليل نهار باحب اكتب حاجات كوميدية عشان تخفف شوية من الضغوط اللي علينا ولكن المرة ده اللي اوحى لي بالموضوع أخوكم جمال مبارك
نبدأ بالحكاية
بيقولك الملك عمل مسابقة لكل الشعب اللي يعلم الحمار بتاع الامير الكلام حيديله مليون دينار ذهب ولكن اللي يفشل رقبته تطير علطول
بدأت الناس تروح ولكن كتير رقبتهم طارت لحد ما جحا فكر وقال لازم يكون لي يد في الموضوع وراح للملك وقاله انا حاعلم الحمار فرد عليه الملك وعارف الشرط قاله طبعا بس انا كمان ليا شرط فرد الملك خير قاله انا عايز 100 ألف دينار ذهب دول مصاريف تعليم الحمار وحاعلمه كمان عشر سنين فرد الملك مش فترة كبيرة برده فرد جحا طبعا بس ده سيادتك حمار مش حاجة قليلة فوافق الملك فوراً
ولما جحا خرج من عند الملك اجتمع الناس حوله وقالوله حرام عليك رقبتك حتطير فيه حد يقدر يعلم الحمار ولو حتى في 100 سنة
فضحك جحا وقالهم يا جماعة أنا خدت 100 ألف دينار وبعد عشر سنين ان شاء الله يا الملك يموت يانا حاموت يا الحمار حيموت
تذكرت هذه القصة جيداً بعد نشر أخبار ان السيد جمال مبارك قرر ان القاهرة ستكون عاصمة الشرق الاوسط عام 2050 وتخيلت عما سيكون عليه تعليق السيد جمال لأصدقائه العالمين ببواطن الأمور بعد خروجه من هذا الاجتماع فبالتأكيد لم يزيد تعليقه كثيراً عن تعليق جحا فبالتأكيد في عام 2050 أي بعد 43 عام من الان فأكيد قالهم ان الحمار سيموت واذا افترضنا ان السيد جمال هو جحا وأن الملك هو الرئيس حسني مبارك فستظل شخصية واحدة هي التي ستصلح أن تكون الحمار طبعا عرفناها جميعا
والطريف انه قد تسربت انباء بحمل زوجة جمال وبالتالي عام 2050 سيكون عمر ابنه ان شاء الله 42 عام وساعتها ان شاء الله يستلمها هو كمان ويخلي مارينا عاصمة الشرق الاوسط 2100
وربنا يدينا ويدكم طولة العمر ويجعله عامر

Tuesday, December 11, 2007

مكافأة للعاملين عشان بيعملوا

رجل بملابس مبهدلة على الأخر يدخل المستشفى ورجل آخر يسنده
أه أأأأأأأأأأأأأأأأأأأأأأأأأه ألحقونا ياناس
تجري الممرضة عليهم خير اللهم اجعله خير
يرد الرجل مش عارف بطني بتتقطع
تضعه الممرضة على سرير بغرفة الاستقبال وتذهب لتنادي الطبيب الذي يتباطأ أولا ثم تتمتم الممرضة في أذنه ببضع كلمات فيجري مسرعاً ويبدأ في الكشف على المريض واضح إن مفيش حاجة خالص ولكن يعطيه بعض المسكنات لعل وعسى
المهم ينتقل المريض لعمل أشعة ووووو كثير من الاجراءات كله ماشي تمام الراجل مش مصدق اللي بيحصل دي حكومي ولا خاص يرد عليه الراجل اللي بيسنده ياباشا دي حكومي صدقني والله - يقول له الأخر باشا ايه الله يخرب بيتك انت عايزهم يكشفوني
وبعد نهاية الاجراءات يطلب المريض المجهول مقابلة مدير المستشفى بعد وعندما يذهب له ويقف أمامه معتدلاً بعد أن يخلع الكوفيه من على وجهه يصرخ مدير المستشفى سيادة الوزير مش معقول أهلا بيك يا فندم خير اللهم اجعله خير . فيرد الوزير لا مفيش أنا كنت بعمل زيارة تفقدية للمستشفى بس ماشاء الله النظام عندكم تمام التمام . مدير المستشفى يرد يا فندم كله بفضل تعليمات سيادتك ده النهاردة عيد في المستشفى وحيتحفر في ذاكرة كل واحد فينا يا فندم .
يرد الوزير لا انتوا فعلا مجتهدين وبالمناسبة دي أنا قررت شهر مكافأة للعاملين في المستشفى لتأدية أعمالهم بطريقة كويسة. يهلل مدير المستشفى ويكاد يرقص من الفرحة وحوله بعض كبار الأطباء ويخرج الوزير
تدخل الممرضة على مدير المستشفى وتقوله مبروك يا فندم . يرد المدير بصراحة انتي ممتازة وتستاهلي كتير . فترد الممرضة أنا مش عايزة كتير يا فندم أنا عايزة 10% من مكافأة كل موظف عندنا
نعم ياختي يرد عليها مدير المستشفى فتقول له الممرضة يا فندم لما سيادة الوزير دخل وهو متنكر وعامل فيها فقير حسيت أن العملية فيها حاجة يعني ايده بيضة وناعمة على الأخر وكمان لابس جزمة كلاركس آخر موضة رغم الجلابية الكحيتي اللي لابسها فأنا قلت أكيد حد بيحاول يعمل تفتيش فجريت صحيت الدكاترة وبتوع الأشعة وندهت بتوع الأشعة من القهوة وندهت بتوع التحاليل من النت كافيه اللي جنبنا عشان يكون كل شيء تمام بس بأمانة أنا مكنتش متوقعة الوزير أنا قلت ده صحفي ولا عضو مجلس شعب وبالكتير وكيل وزارة جديد بس وزير صعب أوي .
ينظر مدير المستشفى من تحت النظارة ويقول لها عفارم عليكي يابت دانا كنت حأروح فيها . والله لأخصملك 10% من مكافأة كل واحد في المستشفى ومني أنا حأديكي ربع المكافأة

الوزير يسير مع مرافقه ويقول له ولاد ممتازين بتوع المستشفى دي يستاهلوا المكافأة
يرد عليه المرافق الأمين يافندم هما ممتازين ممكن بس بصراحة مكنش له لازمة المكافأة حضرتك عارف الميزانية تعبانة وكل مكان حضرتك حتروحه بعد كده حيطلبوا مكافأة وده شيء صعب علينا
يرد الوزير إزاي ملوش لزمة لكل مجتهد نصيب يابني ولا انت رأيك ايه .
المرافق : يا فندم صح بس هما معملوش حاجة استثنائية يستاهلوا عليها مكافأة يعني هما علموا الشغل بتاعهم بس .
يرد الوزير صح والله بس برده نفرح الناس شوية خليهم يتبسطوا .

تنتهي الزيارة ويذهب مساعد الوزير للمنزل ويبدأ في قراءة الجرائد وفي أول صفحة مكافأة لضابط شرطة قام بمطاردة تجار مخدرات حتى قام بالقبض عليهم .

ويقلب الجريدة على الصفحة التالية أخبار الحكومة فيجد أخبار مكافأة وزير الصحة للمستشفى وتحتها صورة لوزير الأوقاف وهو يعطي موظف شيك بألف جنيه مكافأة لأنه رفض رشوة من أحد المتعاملين مع الوزارة .
ويبدأ يتمتم هو ايه الحكاية هو المفروض الناس متشتغلش وتاخد مرتبها كده
تكلمه زوجته انت ايه اللي جرالك بتكلم نفسك .
لا والله كل الوزرا بيدوا مكافآت للناس عشان بتشتغل وعشان مبيخدوش رشوة وعشان وعشان كأن المرتب ده حاجة كده مقابل اننا نتحرك من بتنا للشغل وبعد كده بأه الشغل ده حاجة تانية
أنا مرتبي مليان بدلات بدل تمثيل وبدل حضور جلسات وبدل ماحد ياخدهم ومش عارف طيب المرتب بأخده بتاع ايه

فترد مراته والضابط اللي طارد بتوع المخدرات أخد مكافأة ليه هو المفروض يروح يشرب معاهم .
فيكمل كلامها ولا الموظف اللي رفض ياخد رشوة كأن خلاص الموظفين كلهم مرتشين فالمفروض ندي اللي مبياخدش رشوة مكافأة .

يطلب منها أحد الدوسيهات من حقيبته ويبدأ في الكتابة فتسأله انت بتعمل ايه
فيرد عليها أبدا بكتب طلب للوزير عشان يصرف مكافأة لطقم المكتب كله عشان بيجوا الشغل كل يوم الساعة 8 تمام


يا رب اسمع رأيكم مش في القصة بس ولكن في الحكاية دي كمان هل المكافأت اللي بتتصرف للناس بتوع الحكومة (العبدلله موظف حكومي يعني مش بأحسد ولا بأحقد عليهم والله) عمال على بطال عشان بيعملوا شغلهم شيء كويس ولا شيء يبعث على الكسل على اعتبار ان المرتب بالنسبة لنا (قليل أو كتير دي مشكلة تانية) أصبح حق مكتسب)

Thursday, June 21, 2007

ماذا يحدث فى بنك الاسكندريه ؟


ماذا يحدث في بنك الاسكندرية ؟
تابع معظمنا الأحداث التي رافقت ما حدث ولايزال يحدث في صفقة بنك الاسكندرية وطبعا واضح من مسار الاحداث أن الموضوع برمته يتجه شرقاً نحو اسرائيل . ولكن اخواننا المسئولين في البنك لا يفكرون في حل لتجميل وجههم في هذه المشكلة فقط ولكن هناك مشكلة أخرىوهي تجميل وجه النظام في هذه الصفقة . فالكل يعرف بأمر الـ 11 مليار التي تم انفاقها على إعادة هيكلة البنك ثم تم بيعه بعدها بـ 11.5 مليار وبعدها بيع البنك لبنك ساوباولو الايطالي الذي سيقوم ببيع البنك لمؤسسة صهيونية.
ومن المعروف ان بنك الاسكندرية قبل بيعه كان يعد من المؤسسات المالية المستقرة نوعاً ما ولم تتعرض لهزات كبيرة مثل باقي المؤسسات المالية . المهم حتى لا أطيل عليكم طبعاً ميزانية البنك التي ستظهر في خلال أسابيع ممتازة ووضعها المالي رائع ولكن السيد محمود عبد اللطيف الذي يعمل الآن مديراً تنفيذياً وليس رئيس مجلس إدارة كسابق عهده يحاول جاهداً تشويه صورة الميزانية الخاصة بالبنك حتى يبدو البنك بصورة سيئة مما يبرر القيام بعملية البيع بهذا الشكل وقد قام سيادته بحركة تجعل أسياده من اليهود الذين سيقومون بشراء البنك يتمسكون به جداً فهذه الحركة لا يقوم بها إلا إبليس شخصياً
فقد صدرت أوامر داخلية بالبنك بتصنيف أي دين تم التأخر في سداده لمدة قسط واحد بأنه (ديون رديئة) وطبعا الديون الرديئة أي أنه لن يتم تحصيلها وفي هذه الحالة يقوم البنك باقتطاع جزء من الأرباح يطلق عليه مخصص ديون ردئية لمواجهة هذه المشكلة وبالتالي تقل أرباح البنك في الميزانية وتزيد المخصصات مما يشوه صورة ميزانية البنك ويجعلها تبدو وكأن البنك لا يحقق الارباح المتوقعة
وطبعاً أي بنك في العالم لا يقوم بتصنيف الديون على أنها رديئة في حالة التأخر لقسط واحد بل هناك ديون يتم التأخر في سدادها لمدة عام ومع ذلك تعتبر ديون جيدة وذلك إما لوجود ضمانات تغطيها أو للسمعة الجيدة للعميل . ولا ندري لصالح من يقوم عبد اللطيف بهذه الافعال .
أما ما يقوم به مع الموظفين من محاولات لتطفيشهم والانتقاص من الامتيازات التي يحصلون عليها سابقاً فهذا نؤجله لموضوع مستقل قريباً ان شاء الله