مكافأة للعاملين عشان بيعملوا

رجل بملابس مبهدلة على الأخر يدخل المستشفى ورجل آخر يسنده
أه أأأأأأأأأأأأأأأأأأأأأأأأأه ألحقونا ياناس
تجري الممرضة عليهم خير اللهم اجعله خير
يرد الرجل مش عارف بطني بتتقطع
تضعه الممرضة على سرير بغرفة الاستقبال وتذهب لتنادي الطبيب الذي يتباطأ أولا ثم تتمتم الممرضة في أذنه ببضع كلمات فيجري مسرعاً ويبدأ في الكشف على المريض واضح إن مفيش حاجة خالص ولكن يعطيه بعض المسكنات لعل وعسى
المهم ينتقل المريض لعمل أشعة ووووو كثير من الاجراءات كله ماشي تمام الراجل مش مصدق اللي بيحصل دي حكومي ولا خاص يرد عليه الراجل اللي بيسنده ياباشا دي حكومي صدقني والله - يقول له الأخر باشا ايه الله يخرب بيتك انت عايزهم يكشفوني
وبعد نهاية الاجراءات يطلب المريض المجهول مقابلة مدير المستشفى بعد وعندما يذهب له ويقف أمامه معتدلاً بعد أن يخلع الكوفيه من على وجهه يصرخ مدير المستشفى سيادة الوزير مش معقول أهلا بيك يا فندم خير اللهم اجعله خير . فيرد الوزير لا مفيش أنا كنت بعمل زيارة تفقدية للمستشفى بس ماشاء الله النظام عندكم تمام التمام . مدير المستشفى يرد يا فندم كله بفضل تعليمات سيادتك ده النهاردة عيد في المستشفى وحيتحفر في ذاكرة كل واحد فينا يا فندم .
يرد الوزير لا انتوا فعلا مجتهدين وبالمناسبة دي أنا قررت شهر مكافأة للعاملين في المستشفى لتأدية أعمالهم بطريقة كويسة. يهلل مدير المستشفى ويكاد يرقص من الفرحة وحوله بعض كبار الأطباء ويخرج الوزير
تدخل الممرضة على مدير المستشفى وتقوله مبروك يا فندم . يرد المدير بصراحة انتي ممتازة وتستاهلي كتير . فترد الممرضة أنا مش عايزة كتير يا فندم أنا عايزة 10% من مكافأة كل موظف عندنا
نعم ياختي يرد عليها مدير المستشفى فتقول له الممرضة يا فندم لما سيادة الوزير دخل وهو متنكر وعامل فيها فقير حسيت أن العملية فيها حاجة يعني ايده بيضة وناعمة على الأخر وكمان لابس جزمة كلاركس آخر موضة رغم الجلابية الكحيتي اللي لابسها فأنا قلت أكيد حد بيحاول يعمل تفتيش فجريت صحيت الدكاترة وبتوع الأشعة وندهت بتوع الأشعة من القهوة وندهت بتوع التحاليل من النت كافيه اللي جنبنا عشان يكون كل شيء تمام بس بأمانة أنا مكنتش متوقعة الوزير أنا قلت ده صحفي ولا عضو مجلس شعب وبالكتير وكيل وزارة جديد بس وزير صعب أوي .
ينظر مدير المستشفى من تحت النظارة ويقول لها عفارم عليكي يابت دانا كنت حأروح فيها . والله لأخصملك 10% من مكافأة كل واحد في المستشفى ومني أنا حأديكي ربع المكافأة

الوزير يسير مع مرافقه ويقول له ولاد ممتازين بتوع المستشفى دي يستاهلوا المكافأة
يرد عليه المرافق الأمين يافندم هما ممتازين ممكن بس بصراحة مكنش له لازمة المكافأة حضرتك عارف الميزانية تعبانة وكل مكان حضرتك حتروحه بعد كده حيطلبوا مكافأة وده شيء صعب علينا
يرد الوزير إزاي ملوش لزمة لكل مجتهد نصيب يابني ولا انت رأيك ايه .
المرافق : يا فندم صح بس هما معملوش حاجة استثنائية يستاهلوا عليها مكافأة يعني هما علموا الشغل بتاعهم بس .
يرد الوزير صح والله بس برده نفرح الناس شوية خليهم يتبسطوا .

تنتهي الزيارة ويذهب مساعد الوزير للمنزل ويبدأ في قراءة الجرائد وفي أول صفحة مكافأة لضابط شرطة قام بمطاردة تجار مخدرات حتى قام بالقبض عليهم .

ويقلب الجريدة على الصفحة التالية أخبار الحكومة فيجد أخبار مكافأة وزير الصحة للمستشفى وتحتها صورة لوزير الأوقاف وهو يعطي موظف شيك بألف جنيه مكافأة لأنه رفض رشوة من أحد المتعاملين مع الوزارة .
ويبدأ يتمتم هو ايه الحكاية هو المفروض الناس متشتغلش وتاخد مرتبها كده
تكلمه زوجته انت ايه اللي جرالك بتكلم نفسك .
لا والله كل الوزرا بيدوا مكافآت للناس عشان بتشتغل وعشان مبيخدوش رشوة وعشان وعشان كأن المرتب ده حاجة كده مقابل اننا نتحرك من بتنا للشغل وبعد كده بأه الشغل ده حاجة تانية
أنا مرتبي مليان بدلات بدل تمثيل وبدل حضور جلسات وبدل ماحد ياخدهم ومش عارف طيب المرتب بأخده بتاع ايه

فترد مراته والضابط اللي طارد بتوع المخدرات أخد مكافأة ليه هو المفروض يروح يشرب معاهم .
فيكمل كلامها ولا الموظف اللي رفض ياخد رشوة كأن خلاص الموظفين كلهم مرتشين فالمفروض ندي اللي مبياخدش رشوة مكافأة .

يطلب منها أحد الدوسيهات من حقيبته ويبدأ في الكتابة فتسأله انت بتعمل ايه
فيرد عليها أبدا بكتب طلب للوزير عشان يصرف مكافأة لطقم المكتب كله عشان بيجوا الشغل كل يوم الساعة 8 تمام


يا رب اسمع رأيكم مش في القصة بس ولكن في الحكاية دي كمان هل المكافأت اللي بتتصرف للناس بتوع الحكومة (العبدلله موظف حكومي يعني مش بأحسد ولا بأحقد عليهم والله) عمال على بطال عشان بيعملوا شغلهم شيء كويس ولا شيء يبعث على الكسل على اعتبار ان المرتب بالنسبة لنا (قليل أو كتير دي مشكلة تانية) أصبح حق مكتسب)